Papila leri ri na 7 wa tipheji.
SWITSUNDZUXO
Papila leri ri avanyisiwile hi swiyenge swinharhu:
U languteriwa ku hlamula xivutiso XIN'WE eka xiyenge xin'wana na xin'wana.
Hlamula swivutiso hinkwaswo hi ririmi ra Xitsonga.
Sungula ku hlamula xivutiso xin'wana na xin'wana eka pheji yintshwa u tlhela u nkhwatihata emakumu ka xiyenge xin'wana na xin'wana.
Nombora nhlamulo hilaha swivutiso swi nomboriweke hakona. Nyika nhlamulo yin'wana na yin'wana nhlokomhaka leyi faneleke.
Endla nkunguhato u nga si sungula ku tsala ntirho wa wena. Tirhisa pheji yin'we ntsena ku kombisa leswi u kunguhatiseke xiswona xitsalwana xa wena. Le henhla ka pheji leyi ku fanele ku tsariwa hi maletere lamakulu leswaku i NKUNGUHATO. U nga tirhisa mimepe yo hlengeleta miehleketo. Loko u hetile ku tsala, bana ntila wu hingakanya nkunguhato wun'wana na wun'wana.
Tsala hi vurhon'wana (swi saseka no vonaka), u landzelela milawu leyi faneleke ya mapeletelo, mahikahatelo na mavumbelo ya swivulwa.
Landzelela swiletelo leswi andlariweke eka xivutiso xin'wana na xin'wana.
Tirhisa kwalomu ka 80 wa timinete eka XIYENGE XA A, 40 wa timinete eka XIYENGE XA B na 30 wa timinete eka XIYENGE XA C.
XIYENGE XA A: SWITSHURIWA SWA SWITSALWANA XIVUTISO XA 1 SWILETELO:
Hlawula nhlokomhaka yin'we ntsena leyi u yi twisisaka swinene, kutani u tsala xitsalwambiko hi yona, kambe u nga humi emhakeni.
Rhanga u endla nkunguhato u nga si sungula ku tsala.
Xitsalwana xa wena xi fanele ku va kwalomu ka 400 - 450 wa marito.
Exikarhi ka lembe ku vile ni xitereko xa vadyondzisi lava a va koxa ku engeteleriwa muholo. Hlamusela leswi nga humelela u ri karhi u kombisa ku khumbeka ka n'wina vadyondzi hi mhaka leyi. [50]
KUMBE
Wena na murhandziwa wa wena mi catile eka lembe leri nga hundza. Hi hlamusele migingiriko hinkwayo leyi endliweke ku lulamisela siku leri u ri karhi u kombisa leswi a wu titwisa xiswona loko siku ra nkhuvo ri nga si fika. [50]
KUMBE
Xifaniso lexi nga laha hansi, xi kombisa leswaku eka mikarhi ya sweswi hina vaakatiko va Afrika-Dzonga hi vanhu lava hanyaka swin'we na ku amukelana. Xana mhaka leyi i ntiyiso ke? Nyika vonelo ra wena u ri karhi u seketela hi swikombiso leswi tshembisaka.
Hi lembe ra 2010 ntlangu wa bolo ya milenge ya misava wu ta khomeriwa laha Afrika-Dzonga. Xana hi swihi leswi va Ndzawulo ya Vuhlayiseki va faneleke ku swi endla leswaku ku ta hunguteka vugevenga hi nkarhi lowu ke? [50]
KUMBE
Xiya xifaniso lexi nga laha hansi, kutani u hlamusela ku onhiwa ka timfanelo ta vana hi tindlela to hambanahambana.
KUMBE
Ikhonomi ya tiko ra Afrika-Dzonga yi lawuriwa hi vuvekisi bya matiko ya le handle. Seketela kumbe u kaneta mhaka leyi. [50]
KUMBE
Masiku lawa ku na mitlawa yo hambanahambana ya tipolitiki leyi tumbuluxiwaka. Xana mhaka leyi yi kombisa yini hi tlhelo ra xiyimo xa swa tipolitiki eka tiko ra hina? [50]
KUMBE
Munhu hambi a tswariwile eka ndyangu wa vusweti, a nga swi kota ku humelela a va xirho xo xiximeka etikweni. Hlamusela mhaka leyi u ri karhi u tirhisa vumbhoni lebyi tshembisaka. [50]
NTSENGO WA XIYENGE XA A: 50 XIYENGE XA B: SWITSHURIWA SWA SWITSALWAMBIKO SWO LEHA XIVUTISO XA 2 SWILETELO:
Hlawula nhlokomhaka yin'we ntsena leyi u yi twisisaka swinene, kutani u tsala xitsalwambiko hi yona, kambe u nga humi emhakeni.
Rhanga u endla nkunguhato u nga si sungula ku tsala.
Xitsalwambiko xa wena xi fanele ku va kwalomu ka 180 - 200 wa marito.
Sungula nhlamulo ya wena eka pheji yintshwa.
Papila ra xinghana
Tiyindlu ta ka va munghana wa wena ti tshwile hinkwato hikwalaho ka ritshwa leri a ri ri kona. Wena tanihi munghana wa yena n'wi tsalele papila u n'wi chavelela eka mhangu leyi n'wi humeleleke. [30]
KUMBE
Mbulavulo
Mudyondzisi wa n'wina u tikumerile ntirho ePalamende eKapa, kutani ku endliwile xinkhubyana xo lelana na yena. Wena tanihi matsalana wa vandla ra swichudeni u komberiwile ku nyika mbulavulo wo yimela vadyondzi. Tsala mbulavulo lowu. [30]
KUMBE
Burochara Wa ha ku pfula bindzu ro rhurhela vuyeni. Endla burochara leyi nga ta andlala vukorhokeri bya ndhawu leyi eka vaakatiko. [30] KUMBE
Xiviko xa ximfumo U endlile ndzavisiso wa leswi endlaka leswaku vana va nghenelela eka mhaka ya swidzidziharisi. Nyika xiviko xa leswi u swi kumeke. [30] NTSENGO WA XIYENGE XA B: 30
XIYENGE XA C: SWITSHURIWA SWA SWITSALWAMBIKO SWO KOMA XIVUTISO XA 3 SWILETELO:
Hlawula nhlokomhaka yin'we leyi u yi twisisaka swinene, kutani u tsala xitsalwambiko hi yona, kambe u nga humi emhakeni.
Rhanga u endla nkunguhato u nga si sungula ku tsala.
Xitsalwambiko xa wena xi fanele ku va kwalomu ka 100 - 120 wa marito.
Swileriso
U mutswari loyi a nga na n'wana loyi sweswi a nga na malembe ya khumenkombo. N'wi nyike swiletelo leswi nga ta n'wi pfuna ku hanya vutomi bya vutihlamuleri. [20]
KUMBE
Xinavetiso
Wena u n'wini wa khampani yo endla mimovha. Sweswi ma ha ku endla movha wa manyunyu. Boxa vito ra khampani leyi u tlhela u endla xinavetiso xo xavisa movha lowu. [20]
KUMBE
Dayari
A mi humile rendzodyondzo ro ya ePitori na le Joni hi xikolo xa n'wina hi masiku ya 11 Mawuwani 2009 ku fika hi siku ra 13 Mawuwani 2009. Tsala mahungu lama u nga ta ma nghenisa eka dayari u kombisa leswi swi nga endleka. [20]
NTSENGO WA XIYENGE XA C: 20
NTSENGO WA TIMARAKA: 100
